წალკის რაიონში 34 წლის მამაკაცი მოკლეს

2016-10-04 11:32:35, 1449 ნახვა

სამართალი

წალკის რაიონში, სოფელ ტბეთში 34 წლის მამაკაცი საკუთარ სახლში მოკლეს. ახალგაზრდა მამაკაცს სხეულზე ცივი იარაღით მიყენებული ჭრილობები აღენიშნება.

როგორც "ექსპრესნიუსს" შსს-ს პრეს-სამსახურმა აცნობა, მომხდართან დაკავშირებით შსს-ს ქვემო ქართლის პოლიციის დეპარტამენტის თანამშრომლებმა, ჩატარებული ოპერატიულ-საგამოძიებო ღონისძიებების შედეგად, 1972 წელს დაბადებული გ. ხ. განზრახ მკვლელობის ბრალდებით, ხოლო 1975 წელს დაბადებული ზ. ხ. ჯანმრთელობის განზრახ დაზიანების ბრალდებით დააკავეს.

მათივე ინფორმაციით, გამოძიებამ დაადგინა, რომ გ.ხ.-მ წალკის რაიონის სოფელ ტბეთში, ეჭვიანობის ნიადაგზე, ურთიერთშელაპარაკებისას, დანით სხეულზე მრავლობითი ჭრილობა მიაყენა 1982 წელს დაბადებულ მ. პ.-ს, რომელიც შემთხვევის ადგილზე გარდაიცვალა.

უწყების ცნობით, კონფლიქტში ასევე მონაწილეობდა გ.ხ.-ს ძმა - ზ.ხ., რომელმაც მკვლელობამდე მ.პ.-ს სხეულზე სხვადასხვა დაზიანება მიაყენა. სამართლდამცველებმა ორივე ბრალდებული ცხელ კვალზე დააკავეს. პოლიციამ მკვლელობის იარაღი - დანა ნივთმტკიცებად ამოიღო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან