ნოდარ ხადური აზიის განვითარების ბანკის (ADB) მმართველთა საბჭოს ყოველწლიურ შეკრებაში მონაწილეობს

2016-05-02 20:00:09, 589 ნახვა

საზოგადოება

2-3 მაისს, საქართველოს ფინანსთა მინისტრი, საქართველოს მხრიდან აზიის განვითარების ბანკის (ADB) მმართველი, ნოდარ ხადური მონაწილეობს ბანკის მმართველთა საბჭოს ყოველწლიურ შეკრებაში, რომელიც გერმანიაში, ქალაქ ფრანკფურტში იმართება.

ფინანსთა სამინისტროს ცნობით, ვიზიტის ფარგლებში დაგეგმილია მაღალი დონის ორმხრივი შეხვედრები, მათ შორის აზიის განვითარების ბანკის პრეზიდენტთან, ტაკეჰინო ნაკაოსთან, ADB-ის ცენტრალური და დასავლეთ აზიის დეპარტამენტის გენერალურ დირექტორთან, შონ ო'სულივანთან და მის მოადგილესთან, ჰონგ ვეისთან, სკანდინავიის საინვესტიციო ბანკის (Nordic Investment Bank) პრეზიდენტსა და აღმასრულებელ დირექტორთან ჰენრიკ ნორმანთან და აღმასრულებელ დირექტორსა და ორგანიზაციის ხელმძღვანელთან, სორენ მორტენსენთან.

შეხვედრების ფარგლებში განიხილული იქნება საქართველოში მიმდინარე ეკონომიკური პროცესები და საშუალოვადიანი მაკროეკონომიკური ინდიკატორები, მიმდინარე საინვესტიციო პროექტები და სამომავლო თანამშრომლობის საკითხები.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან