შსს-ს აკადემიაში უწყებებს შორის ფსიქოლოგიის სფეროში თანამშრომლობის მემორანდუმი გაფორმდა

2016-03-11 10:33:23, 577 ნახვა

საზოგადოება

შსს-ს აკადემიაში თავდაცვის სამინისტროს, სახელმწიფო დაცვის სპეციალურ სამსახურს, დანაშაულის პრევენციის ცენტრს, სასჯელაღსრულებისა და პრობაციის სასწავლო ცენტრს, იუსტიციის სასწავლო ცენტრს, არასაპატიმრო სასჯელთა აღსრულებისა და პრობაციის ეროვნული სააგენტოს, დავით აღმაშენებლის სახელობის საქართველოს ეროვნული თავდაცვის აკადემიასა და შინაგან საქმეთა სამინისტროს აკადემიას შორის ფსიქოლოგიის სფეროში ურთიერთთანამშრომლობის მემორანდუმი გაფორმდა.

შსს-ს ინფორმაციით, მემორანდუმის ხელმოწერის ღონისძიებას, აღნიშნული უწყებების ხელმძღვანელ პირებთან ერთად, შს მინისტრის მოადგილე შალვა ხუციშვილი, სახელმწიფო უსაფრთხოების სამსახურის დირექტორის მოადგილე ლევან იზორია და სახელმწიფო დაცვის სპეციალური სამსახურის უფროსი ანზორ ჩუბინიძე დაესწრნენ.

„მემორანდუმის მიზანია მხარეთა შორის ფსიქოლოგიის სფეროში არსებული მიღწევების გაზიარება, სამომავლო სამეცნიერო კვლევითი საქმიანობის ერთობლივად განხორციელება, ამ მიმართულებით ურთიერთობის განვითარება და განმტკიცება. მემორანდუმის მონაწილე მხარეები უზრუნველყოფენ: სამუშაო ჯგუფის შექმნას; ერთობლივი პროექტების შემუშავებასა და განხორციელებას; არსებულ, მიმდინარე პროექტებში ჩართვასა და დახმარების გაწევას; საინფორმაციო და კვლევითი რესურსების ურთიერთგაზიარებას, ასევე, ერთობლივი სამეცნიერო და პრაქტიკული კვლევების შედეგების ბაზის შექმნასა და განახლებას“, - აცხადებენ შსს-ში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან