ნინო ნიჟარაძე სამინისტროს პროგრამით მოსარგებლე პაციენტებს შეხვდა, რომლებმაც ავთვისებიანი სიმსივნე უკვე დაამარცხეს

2022-09-15 16:11:41, 1613 ნახვა

რეგიონი

აჭარის ჯანმრთელობისა და სოციალური დაცვის მინისტრი ნინო ნიჟარაძე, პირველ მოადგილესთან მარი ზანაქიძესთან, აჭარის მთავრობის ადმინისტრაციის უფროსთან თინა ზოიძესთან და ექიმ ონკოლოგებთან ერთად, იმ პაციენტებს შეხვდა, რომლებიც სამინისტროს "ავთვისებიანი სიმსივნით დაავადებულ პაციენტთა დამატებითი სამედიცინო მომსახურების პროგრამის" მოსარგებლეები არიან და დაავადება უკვე დაამარცხეს.

,,მსოფლიოში და მათ შორის საქართველოში ძუძუს კიბოთი ავადობა პირველ ადგილზეა, ჩვენს ქვეყანაში კი კიბოს დიაგნოზს შორის 30%-ს შეადგენს. ქვეყნის მასშტაბით მოქმედებს სახელმწიფო პროგრამა, რომელიც საკმაოდ მაღალი პროცენტით ფარავს დიაგნოსტიკას და მკურნალობის ხარჯებს. ავტონომიური რესპუბლიკის ბიუჯეტით აჭარის ჯანდაცვის სამინისტრო 2 300 000 ლარის ფარგლებში დამატებით უზრუნველყოფს ამ პაციენტთა როგორც ქირურგიულ, ისე ძვირადღირებულ

მედიკამენტოზურ მკურნალობას. სამინისტრო ასევე აფინანსებს მაღალტექნოლოგიურ დიაგნოსტიკურ კველევებს. აღნიშნული მიმართულებით დაფინანსება ყოველწლიურად მზარდია. ჩვენ ვხვდებით ყვლა პროგრამის ბენეფიციარს, ვისმენთ მათ საჭიროებებს და ვცდილობთ მაქსიმალურად გავითვალისწინოთ მომდევნო წლის პრიორიტეტებში“, - აღნიშნა მინისტრმა, ნინო ნიჟარაძემ.

შეხვედრაზე ონკოლოგებმა ყურადღება გაამახვილეს მოქნილ ბიუჯეტზე და სამინისტროს ღიაობაზე. აღნიშნეს, რომ ონკო პროგრამები მორგებულია პაციენტების საჭიროებებზე და უწყება ითვალისწინებს ექიმ-სპეციალისტთა რეკომენდაციებს. ასევე ისაუბრეს გამოწვევებსა და გასათვალისწიენელ სხვა მნიშვნელოვან ღონისძიებებზე.

,,ვერანაირ სამედიცინო პროცედურას ვერ ჩავიტარებდი, რომ არ ყოფილიყო სახელმწიფო დაფინანსება. ჩემთვის ძალიან მნიშვნელოვანი იყო ექიმის მხარდაჭერა, სამინისტროს ფინანსური თანადგომა, რისთვისაც ძალიან დიდი მადლობა მინდა გადაგიხადოთ. ორი მცირეწლოვანი შვილი მყავს, ერთი დღეს გავაცილე პირველ კლასში და არ მაქვს უფლება ვიყო უიმედო. ახლა ვიცი, რომ დიდხანს ვიცოცხლებ შვილებთან ერთად და ეს თქვენი ყველას დამსახურებაა“, - საუბრისას აღნიშნა 42 წლის ხათუნა ჩოგაძემ.

პირველად აჭარის ჯანდაცვის სამინისტრომ 2014 წელს დაიწყო ძუძუს კიბოთი დაავადებულ პაციენტთათვის თარგენტული, იმუნოთერაპიული და ბისფოსფონატების ჯგუფის ძვირადღირებული მედიკამენტების დაფინანსება. პროგრამის ფარგლებში წლის განმავლობაში მხოლოდ აღნიშნული კომპონენტით საშუალოდ 500 ზე მეტი პაციენტი სარგებლობს.

პროგრამა ითვალისწინებს, ავთვისებიანი სიმსივნით დაავადებულ პაციენტთათვის დამატებითი სამედიცინო მომსახურების (სამედიცინო მომსახურება, რომელიც არ ფინანსდება სახელმწიფო ბიუჯეტით დაფინანსებული სამედიცინო პროგრამებით) დაფინანსებას. ასევე, ფინანსდება საყოველთაო ჯანმრთელობის დაცვის სახელმწიფო პროგრამის გეგმიური სტაციონარული მომსახურების, ქიმიოთერაპიული და სხივურითერაპიული სამედიცინო მომსახურების თანაგადახდა სახელმწიფო პროგრამით დაფინანსებული ტარიფის ფარგლებში.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),