ერაყის ქურთისტანის პრეზიდენტი თანამდებობიდან გადადგა

2017-10-30 14:54:17, 2397 ნახვა

მსოფლიო

ერაყის ქურთისტანის პრეზიდენტი მასუდ ბარზანი თანამდებობიდან გადადგა, - ამის შესახებ BBC იუწყება.

მედია საშუალების ინფორმაციით, ბარზანის პრეზიდენტობის ვადა 1 ნოემბერს ეწურებოდა. ამასთან, მან თავიდანვე განაცხადა, რომ ის თანამდებობისთვის ბრძოლას არ აპირებდა.

მედიის ცნობით, პრეზიდენტის ადმინისტრაციამ პარლამენტს ოფიციალური წერილით მიმართა, რომელიც ქვეყნის მმართველობის რეფორმას შეეხება. კერძოდ, რეფორმის თანახმად, პრეზიდენტის უფლება-მოსილებები პარლამენტსა და სასამართლო სისტემას შორის უნდა გადანაწილდეს.

გარდა ამისა, BBC წერს, რომ ბარზანის გადადგომას რეგიონში არეულობები მოჰყვა. მისი მხარდამჭერები პარლამენტში შეჭრას ცდილობდნენ, თუმცა სამართალდამცველებმა მათ ამის უფლება არ მისცეს.

მასუდ ბარზანი ერაყის ქურთისტანის პოსტს 2005 წლიდან იკავებდა.

შეგახსენებთ, რომ 25 სექტემბერს ერაყის ქურთისტანის რეგიონში რეფერენდუმი ჩატარდება. კერძოდ კი, ქურთისტანის რეგიონის მოსახლეობამ მხარი დაუჭირა ერაყისგან გამოყოფის საკითხს. რეფერენდუმის შედეგად დადგინდა, რომ მოსახლეობის 92% -მა დამოუკიდებლობას დაუჭირა მხარი. რეფერენდუმს მსოფლიოს მასშტაბით ბევრი მოწინააღმდეგე ჰყავდა. ქურთისტანის რეგიონის ერაყისგან გამოყოფას უარყოფითად აფასებს გაეროც. გაეროს გენერალური მდივანი ანტონიო გუტერეში აცხადებს, რომ ეს პროცესი “ისლამური სახელმწიფოს“ წინააღმდეგ ბრძოლას ხელს უშლის.

რეფერენდუმის ჩატარების გადაწყვეტილება ერაყის ქურთისტანის პარლამენტმა 15 სექტემბერს მიიღო. კენჭისყრა რეფერენდუმის შესახებ 2-წლიანი პაუზის შემდეგ განახლდა. პლებისციტის ჩატარებას მხარი 68 დეპუტატიდან 65-მა დაუჭირა.

ცნობისთვის, ერაყის ქურთისტანი არაოფიციალური სახელწოდებაა. ის ერაყის ჩრდილოეთით მდებარეობს და ქვეყნის ერთადერთ ავტონომიურ რეგიონს წარმოადგენს.