კვირიკაშვილი: ადამიანის უფლებების დაცვა მთავრობის ერთ-ერთი მთავარი პრიორიტეტია

2016-11-26 12:49:49, 807 ნახვა

პოლიტიკა

საქართველოს პრემიერ-მინისტრის მოვალეობის შემსრულებელის, გიორგი კვირიკაშვილის განცხადებით, ადამიანის უფლებების დაცვის ინსტიტუციონალიზაცია მთავრობის ერთ-ერთი მთავარი პრიორიტეტია, - ამის შესახებ გიორგი კვირიკაშვილმა დღევანდელ რიგგარეშე სხდომაზე, სიტყვით გამოსვლისას განაცხადა.

როგორც კვირიკაშვილმა აღნიშნა, მთავრობა ყველაფერს გააკეთებს იმისთვის, რომ ადამიანის უფლებები ქვეყანაში იყოს დაცული.

"ადამიანის უფლებების დაცვის ინსტიტუციონალიზაცია მთავრობის ერთ-ერთი მთავარი პრიორიტეტია. ჩვენი სტრატეგიიდან გამომდინარე, სამოქმედო გეგმას ფეხდაფეხ მივყვებით. ჩვენთვის ფუნდამენტურია ასევე, მედიის თავისუფლება და უნდა ითქვას, რომ დღეს საქართველოში ამ კუთხით ძალიან მნიშვნელოვანი გაუმჯობესება გვაქვს გასული 4 წლის განმავლობაში", - აღნიშნა კვირიკაშვილმა.

პრემიერ-მინისტრის მოვალეობის შემსრულებლის თქმით, მთავრობისთვის სამართალდამცავი სისტემების რეფორმა ასევე პრიორიტეტულია.

"სამართალდამცავი სისტემების რეფორმა, რომლის ძალიან მნიშვნელოვანი ნაწილიც დასრულებულია, გაგრძელდება. გაგრძელდება იმისათვის, რომ კიდევ უფრო გავაუმჯობესოთ ამ მიმართულებით ქვეყნის რეპუტაცია. ყველაფერი ეს მიმართული იქნება, იმისათვის, რომ პირველ რიგში ჩვენი მოქალაქეების უსაფრთხოება ვუზრუნველყოთ", - განაცხადა გიორგი კვირიკაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან