ირაკლი ფირცხალავას ოჯახს 15 000 ლარიანი გირაოს თანხა დაუბრუნდება

2016-04-26 18:10:21, 788 ნახვა

სამართალი

შსს ცენტრალური კრიმინალური პოლიციის დეპარტამენტის დირექტორის ყოფილი მოადგილის ირაკლი ფირცხალავას ოჯახს 15 000 ლარიანი გირაოს თანხა დაუბრუნდება.

შესაბამისი გადაწყვეტილება დღეს მოსამართლე დავით მგელიაშვილმა მიიღო. მან გირაოს თანხის უკან დაბრუნებასთან დაკავშირებით, ფირცხალავას მეუღლის ნინო ხვიტიას შუამდგომლობა დააკმაყოფილა.

ხვიტიას თქმით, იმის გამო, რომ ფირცხალავას ე.წ. კორტებთან ჩატარებული სპეცოპერაციის საქმეზე 12 წლიანი პატიმრობა მიესაჯა, ბუტა რობაქიძის საქმეზე შეფარდებული გირაო აღკვეთის მიზნებს აღარ ემსახურებოდა. აღნიშნულ შუამდგომლობას ბრალდების მხარე არ დაეთანხმა. მიუხედავად ამისა, მოსამართლემ ფირცხალავას მეუღლის შუამდგომლობა მაინც დააკმაყოფილა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან