პოლიციელებზე თავდასხმაში ბრალდებული 21 წლის მათე დევიძე კვლავ პატიმრობაში რჩება. აღნიშნული გადაწყვეტილება თბილისის საქალაქო სასამართლოს მოსამართლემ, დავით მგელიაშვილმა მიიღო.

მოსამართლის ამ გადაწყვეტილებას დარბაზში მყოფებისა და დევიძის ოჯახის წევრების უკმაყოფილება მოჰყვა. ისინი სკანდირებდნენ: „მონებო", "სირცხვილი თქვენ, თქვენი დროც მოვა", "ივანიშვილის მონებო".

დღევანდელ პროცესზე მტკიცებულებების დასაშვებობაზე იმსჯელეს. ამასთან, დევიძის მიმართ შეფარდებული აღკვეთის ღონისძიება პატიმრობა გადაისინჯა და ის ძალაში დარჩა.

პროკურორი ანი ხუბეჯაშვილი შუამდგომლობაში განმარტავდა, რომ საქმის განხილვის ამ ეტაპზე ახალი გარემოება არ გამოკვეთილა, რაც აღკვეთის ღონისძიების პატიმრობის შეცვლის საფუძველი გახდებოდა. პროკურორის განმარტებით, მიმალვისა და ახალი დანაშაულის ჩადენის საფრთხეები კვლავ არსებობს. ხუბეჯაშვილის თქმით, დანაშაული მძიმე კატეგორიისაა, ამასთან შემთხვევის შემდეგ, ბრალდებული პასუხისგებისგან თავის არიდებას შეეცადა.

მათე დევიძის ადვოკატები ბრალდების მხარის პოზიციას არ დაეთანხმნენ. უფლებადამცველების თქმით, ვინაიდან გამოძიება უკვე დასრულებულია, ბრალდებულის მხრიდან ახალი დანაშაულის ჩადენის და მიმალვის საფუძველი არ არსებობს. ადვოკატებმა დევიძის გირაოს სანაცვლოდ გათავისუფლება იშუამდგომლეს, რისი ოდენობის განსაზღვრაც სასამართლოს მიანდეს.

მოსამართლე დავით მგელიაშვილმა ბრალდების მხარის პოზიცია გაიზიარა და დევიძე კვლავ პატიმრობაში დატოვა. როგორც მოსამართლემ განმარტა, სასამართლო დასაბუთებული ვარაუდის სტანდარტით ხელმძღვანელობს და მოსამართლისთვის ახალი არსებითი გარემოების წარდგენაა საჭირო, რაც აღკვეთის ღონისძიებას შეცვლის ან გააუქმებს.

მოსამართლის კითხვაზე, ცნობდა თუ არა ბრალდებული თავს დამნაშავედ, დაკავებულმა უპასუხა, რომ "დუმილის უფლებით სარგებლობს".

მათე დევიძის საქმე არსებითად განსახილველად სასამართლოს გადაეცა.

„იმ ინციდენტის შემდეგ არ გაითვალისწინა მოსამართლემ ჩემი ოჯახური მდგომარეობა, არც ჩემი წარსული, მომწყვიტა ჩემს ოჯახს, საყვარელ მეგობრებს, ჩემი გიტარა მენატრება. პატიმრობა ეს არის ყველაზე უკიდურესი ვარიანტი, ჩემს პირობებში არანაირად არ ვიმსახურებ ამას",- განაცხადა დევიძემ.

ცნობისთვის, მათე დევიძე იმ 16 პირს შორისაა, რომელიც სამართალდამცავებმა ნოემბერში მელიქიშვილის გამზირზე მიმდინარე აქციების დროს ადმინისტრაციული წესით დააკავეს. მას სხვებთან ერთად პოლიციელის დაუმორჩილებლობასა და წვრილმანი ხულიგნობის ჩადენას ედავებოდნენ, თუმცა, 48-საათიანი ადმინისტრაციული პატიმრობის ვადის ამოწურვის შემდეგ, როცა ის იზოლატორიდან უნდა გაეშვათ, მუხლი შეუცვალეს და ახლა გამოძიება უკვე სისხლის სამართლის შესაძლო დანაშაულის ჩადენისთვის მიმდინარეობს.

მათე დევიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს.

ავტორი: ექსპრესნიუსი,

სოციალური ქსელები

ივანიშვილის წარმომადგენელი მახაშვილი საფრანგეთში მიღებულ რეზოლუციაზე - უამრავი ტყუილი, ბრალდებაა და ამ აბსურდის საფუძველზე არის მოწოდებები

ნიკა გვარამია: არაფერი საწინააღმდეგო რევოლუციის არ მაქვს, უბრალოდ ვნახე, ამის რესურსები გვაქვს თუ არა

ჟორჟოლიანი - გამოიკვეთა 15 პირველადი მოხმარების პროდუქტი, რომელიც ქსელურ მარკეტებში ფასდაკლებით იქნება ხელმისაწვდომი

თბილისში ქუჩაში არჩევდნენ მოქალაქეებს და ინტერნეტბანკინგიდან ფულს ირიცხავდნენ ე.წ ქურდულ სამყაროსთან კავშირში მყოფი 44 პირი დააკავეს - ვიდეო