The Insider-მა, 60 Minutes-სა და Der Spiegel-თან ერთად, ჩაატარა ჟურნალისტური გამოძიება, რომლის შედეგების მიხედვითაც, მათ მოიპოვეს სამხილები, რომ აუხსნელი ჯანმრთელობის ანომალიები, რომელიც ცნობილია როგორც "ჰავანის სინდრომი" და რომლებიც სხვადასხვა ქვეყნებში ამერიკელ დიპლომატებს ემართებოდათ, შესაძლოა, რუსეთის სამხედრო დაზვერვის, ГРУ-ს სპეციალურ დანაყოფ 29155-თან და მათ მიერ ენერგეტიკული იარაღის გამოყენებასთან იყოს დაკავშირებული. 

საგამოძიებო სტატიაში საუბარია თბილისში, 2021 წლის ოქტომბრით დათარიღებულ შემთხვევაზე, რომლის სამიზნეც საქართველოში ამერიკის შეერთებული შტატების საელჩოს თანამშრომლის მეუღლე გახდა. 

როგორც გამოცემის სტატიაშია ნათქვამი, ქალი ქმართან ერთად, რომელიც აშშ-ის საელჩოს იუსტიციის დეპარტამენტის ატაშე იყო, საქართველოში 2020 წლის თებერვალში, პანდემიისას ჩამოვიდა და თბილისში, დიღმის მასივში ცხოვრობდა. ის იხსენებს, რომ ერთ დღეს, მოულოდნელად გაიგო ძლიერი, გამჭოლი ხმა, რის შემდეგაც თავი ცუდად იგრძნო. სახლის უსაფრთხოების კამერაში გაიხედა და შავი ფერის "მერსედესი“ და მაღალი, გამხდარი მამაკაცი დააფიქსირა. ქალმა მამაკაცსა და მის ავტომობილს ტელეფონით ფოტოები გადაუღო. ის იხსენებს, რომ იგივე ადამიანი 3 წლის შემდეგ ნახა, როდესაც ГРУ-ს 29155-ე ქვედანაყოფის წევრის ფოტო აჩვენეს. 

როგორც The Inisder-ი წერს, საუბარია ალბერტ ავერიანოვზე, 29155-ე ქვედანაყოფის დამფუძნებლის, ანდრეი ავერიანოვის შვილზე. გამოცემის ინფორმაციით, ავერიანოვს 16 წლიდან ამზადებდნენ, რათა ჯგუფის წევრი გამხდარიყო. 

The Insider-ი გამოძიების მთავარ მიგნებებს შორის ასახელებს იმას, რომ ქვედანაყოფის უფროსმა წევრებმა "არალეტალური აკუსტიკური იარაღის" შემუშავებასთან დაკავშირებით გაწეული სამუშაოსთვის სხვადასხვა ჯილდო და პოლიტიკური დაწინაურება მიიღეს.

"არალეტალური აკუსტიკური იარაღი" - რუსულ სამხედრო ლიტერატურაში ეს ტერმინი როგორც ულტრაბგერით, ასევე რადიოსიხშირეზე დაფუძნებული ენერგიის მოწყობილობების აღსაწერად გამოიყენება.

გამოცემები, რომლებმაც ჟურნალისტური გამოძიება ჩაატარეს, მიუთითებენ, რომ ГРУ-ს აღნიშნული ქვედანაყოფი ოპერაციებს მთელ მსოფლიოში ატარებს. 

ავტორი: ექსპრესნიუსი,

სოციალური ქსელები

მოსკოვის ნავთობგადამამუშავებელი ქარხანა კიდევ უფრო დაზიანდა ერთი კვირის განმავლობაში მეორეჯერ თავდასხმის შედეგად.

დიდმა ბრიტანეთმა, გერმანიამ და ნატოს კიდევ ხუთმა ქვეყანამ უკრაინას ასობით მილიონი დოლარის ღირებულების დრონებისა და რაკეტების ახალი მიწოდება დაჰპირდნენ

ცოლის ინფორმაციით, ბაქოს სააპელაციო სასამართლომ აფგან სადიგოვი პატიმრობაში დატოვა

ურეკში 4 ადამიანი ზღვის დინებამ წაიღო, მაშველებმა 4-ვე გამოიყვანეს, თუმცა 1 დაიღუპა