პროკურატურაში ე.წ. კარტოგრაფების საქმეზე ლაშა დარსალიას გამოკითხვა მიმდინარეობს

2020-10-21 13:28:30, 498 ნახვა

სამართალი

აზერბაიჯანთან სადელიმიტაციო და სადემარკაციო კომისიის თავმჯდომარე ლაშა დარსალია გენერალურ პროკურატურაში გამოკითხვაზე იმყოფება.

ამის შესახებ ინფორმაცია „ექსპრესნიუსს“ გენერალურ პროკურატურაში დაუდასტურეს.

დარსალია პროკურატურის შეკითხვებს ე.წ. კარტოგრაფების საქმეზე დაწყებული გამოძიების ფარგლებში პასუხობს.

როგორც მან გამოკითხვის დაწყებამდე ჟურნალისტებთან განაცხადა, სავარაუდოდ, გამოძიებას კითხვები კომისიის მუშაობასთან დაკავშირებით ექნება.

„იქედან გამომდინარე, რომ ბოლო ერთი წელი და ცოტა მეტიცაა, რომ მე ვარ ამ კომისიაში, ალბათ, კითხვები შეეხება კომისიის მუშაობას. არ ვიცი რამდენად რელევანტურია გამოძიებისთვის, ეს დასკვნა უბრალოდ ეხება სტრატეგიასა და ნაბიჯებს, რომელიც ქართულმა მხარემ უნდა შეიმუშაოს“, - განაცხადა ლაშა დარსალიამ.

შეგახსენებთ, რომ საქართველო-აზერბაიჯანის დემარკაციის კომისიის ექსპერტთა საბჭოს უფროსი, ივერი მელაშვილი და წევრი, ნატალია ილიჩოვა 7 ოქტომბერს დააკავეს. პროკურატურის ინფორმაციით, მათ ბრალად უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედება ედებათ.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,