2020-04-08 12:29:59, 1127 ნახვა

---

სესიაშვილი - სტრასბურგის სასამართლოს გადაწყვეტილებით ე.წ. ციხის ბუნტის საქმეზე, კიდევ ერთხელ მოხდა განაჩენის გამოტანა „ნაცმოძრაობის“ ხელისუფლების მიმართ

„სტრასბურგის სასამართლოს გადაწყვეტილებით ე.წ. ციხის ბუნტის საქმეზე კიდევ ერთხელ მოხდა განაჩენის  გამოტანა „ნაციონალი მოძრაობის“ ხელისფლების მიმართ საერთაშორისო დონეზე“, - ამის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა  სტრასბურგის სასამართლოს გადაწყვეტილების თაობაზე  ე.წ. ციხის ბუნტის საქმეზე, რომლითაც სასამართლომ სიცოცხლის უფლების მრავლობითი დარღვევა დაადგინა განაცხადა.

როგორც მან აღნიშნა, ევროპული სასამართლოს გადაწყვეტილება არ იყო მოულოდნელი არავისთვის, მათ შორის, „ნაციონალური მოძრაობის“ იმ წარმომადგნელებისთვისაც, ვინც ეს მძიმე დანაშაულები ჩაიდინა.

მისივე თქმით, ეს არ იყო უბრალოდ ბუნტის ჩახშობა ან რაიმე სპეცოპერაცია, არამედ ეს იყო მიზანმიმართული ქმედება.

„ყველასთვის ცნობილია მიხეილ სააკაშვილის ნათქვამი ცნობილი ფრაზა პარლამენტში გამოსვლის დროს - ნულოვანი ტოლერანტობა. ეს არამც და არამც არ იყო მიმართული კრიმინალის წინააღმდეგ. ეს იყო ზოგადი გზავნილი მთლიანად საზოგადოების მიმართ,  რომ ის ვინაც არის ჩვენთან ის არის ჩვენიანი, დანარჩენი კი, ყველა არის მტერი.  თუ დააკვირდებით, რაც კი მძიმე დანაშაულები ხდებოდა ქვეყანაში „ნაციონალური მოძრაობის" ხელისუფლების მხრიდან, რიგ შემთხვევებში, ამ ყველაფერს ჩვენ პირდაპირ ეთერში ვუყურებდით. ამას არ მალავდნენ და მიზანმიმართულად აკეთებდნენ. ამ ყველაფრის მიზანი იყო ის, რომ საზოგადოებას ჰქონოდა შიში იმიტომ, რომ „დემოკრატიის ფარადას" ამოფარებული, მათი ძალაუფლების შენარჩუნება გადიოდა და ეფუძნებოდა ძალადობას", - აღნიშნა ირაკლი სესიაშვილმა.

მისივე შეფასებით, ჩვენს უახლოეს ისტორიაში ეს არის შავი ლაქა და სამწუხაროდ, ეს ის ხალხია, რომელმაც დღესაც ვერ გაბედა ეს დანაშულები ეღიარებინა და  ზოგიერთ მათგანს დიდხანს  პოლიტიკურ პატიმრებს ეძახდნენ.

„„ნაციონალური მოძრაობის“ ერთ-ერთი წევრი, ბატონი ზოდელავა საუბრობდა, რომ თეა წულუკიანმა განზრახ წააგო ეს საქმე სტრასბურგში, რაც სამარცხვინო განცხადებაა. იმის ნაცვლად, რომ თავი დახარონ და ბოდიში მოიხადონ,  თეა წულუკიანს აბრალებენ, რომ არ დაიცვა ბაჩო ახალაია, რომლის ძალადობაც და სისასტიკეც ცნობილია მთელი მსოფლიო საზოგადოებისთვის.  რამდენიმე კვირის წინ კი, როდესაც ბატონი ვანო მერაბიშვილი ციხიდან გამოვიდა, პირველი პოლიტიკური განცხადება გააკეთა იმის თაობაზე, რომ  მატროსოვის ციხეში არიან პოლიტიკური პატიმრები და ჩვენ ისინი ყველანი უნდა გამოვუშვათ.  ეს არის მათი რეალური პოლიტიკური იდეოლოგია და დამოკიდებულება ქვეყნისა და საზოგადოების მიმართ, რომ არა ბოდიში და არა ის, რომ ჩვენ დანაშაული ჩავიდინეთ და ამას ვაღიარებთ, არამედ ის, რომ ამ მწამებლებს,  სადისტებს ჩვენ გამოვუშვებთ“, - განაცხადა ირაკლი სესიაშვილმა.

 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი