სომხეთის პრემიერ-მინისტრი ნიკოლ ფაშინიანი მზად არის აზერბაიჯანთან ე.წ. მთიანი ყარაბაღის კონფლიქტის დარეგულირებაზე იმსჯელოს, - ამის შესახებ "რია ნოვოსტი" იუწყება.

როგორც ფაშინიანმა განმარტა, მოლაპარაკებები იმ შემთხვევაში გაიმართება, თუ მასში არაღიარებული მთიანი ყარაბაღის რესპუბლიკაც მიიღებს მონაწილეობას.

ფაშინიანი მიიჩნევს, რომ ე.წ. მთიანი ყარაბახის დამოუკიდებლობის საერთაშორისო აღიარება ხელს შეუწყობს სომხეთისა და აღნიშნული რეგიონის გაერთიანებას.

"რაც შეეხება მთიანი ყარაბაღის და სომხეთის გაერთიანებას, ამ რეგიონის საერთაშორისო აღიარება არის ერთ-ერთი ნაბიჯი იმისკენ, რომ ეს გაერთიანება შედგეს. უფრო კონკრეტულად რომ ავხსნა, თუ საერთაშორისო საზოგადოება მთიან ყარაბაღს აღიარებს, როგორც დამოუკიდებელ რესპუბლიკას, იქ მცხოვრები ხალხი მიიღებს იმას რაც სურს და უკვე ამის შემდეგ ჩვენ დავიწყებთ მათთან მოლაპარაკებას და ხალხი თვითონ გადაწყვეტს საკუთარ მომავალს", - განაცხადა ფაშინიანმა.

თავის მხრივ ოფიციალური ბაქო მზად არის სომხეთთან აღნიშნულ საკითხზე მოლაპარაკებები დაიწყოს. აზერბაიჯანის ხელისუფლება სომხეთის ახალ ხელმძღვანელობას მოუწოდებს წინამორბედების შეცდომები არ დაუშვას.

"ჯერ კიდევ გვაქვს იმის იმედი, რომ სომხეთის ახალი პოლიტიკური ხელმძღვანელობა არ დაუშვებს წინამორბედების შეცდომებს, აწარმოებს ჯანსაღ პოლიტიკას და შეეცდება შექმნას ცივილური ურთიერთობები, რათა მეზობლებთან მშვიდობიანად იცხოვროს", - განაცხადა აზერბაიჯანის საგარეო საქმეთა მინისტრმა ჰიკმეტ გაჯიევმა.

ცნობისთვის, 2016 წლის 5 მაისს სომხეთის მთავრობამ ე.წ. მთიანი ყარაბაღის დამოუკიდებლობის აღიარების შესახებ კანონპროექტი განიხილა. მაშინ კანონპროექტი განხილვაზე სომხეთის საპარლამენტო ოპოზიციამ შეიტანა.

შეგახსენებთ, კონფლიქტი ე.წ. მთიან ყარაბაღში 1988 წლის თებერვალში დაიწყო, როდესაც ავტონომიურმა რესპუბლიკამ აზერბაიჯანის შემადგენლობა დატოვა. ამის შემდეგ, 1991 წელს მთიანმა ყარაბაღმა, რომელიც ძირითადად ეთნიკური სომხებით არის დასახლებული, საკუთარი დამოუკიდებლობის შესახებ განაცხადა, რასაც შეიარაღებული კონფლიქტი მოჰყვა. მას შემდეგ, რაც აზერბაიჯანის რეგიონმა დამოუკიდებლობა გამოაცხადა, სომხურმა შეიარაღებულმა ძალებმა მისი ოკუპაცია მოახდინეს. ოკუპირებულია ასევე მთიანი ყარაბაღის მიმდებარედ აზერბაიჯანის 7 რაიონი. 1994 წელს აზერბაიჯანმა და სომხეთმა ცეცხლის შეწყვეტის შესახებ შეთანხმება გააფორმეს. 

ავტორი: ,

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია