ვაშინგტონში აშშ-საქართველოს სტრატეგიული პარტნიორობის ქარტიის ფარგლებში სამუშაო შეხვედრა გაიმართა

2015-05-11 16:56:40, 456 ნახვა

პოლიტიკა

ვაშინგტონში აშშ-საქართველოს სტრატეგიული პარტნიორობის ქარტიის ფარგლებში ეკონომიკის, ვაჭრობისა და ენერგეტიკის სამუშაო ჯგუფის შეხვედრა გაიმართა.

შეხვედრას აშშ-ს მხრიდან ესწრებოდნენ ეკონომიკისა და ბიზნესის საკითხებში სახელმწიფო მდივნის პირველი მოადგილე, კურტ ტონგი, USAID-ის ადმინისტრატორის მოადგილე ევროპასა და ევრაზიაში ჯონათან კატცი და კომერციის მდივნის თანაშემწის აღმასრულებელი მოადგილე ევროპის, ახლო აღმოსავლეთისა და აფრიკის საკითხებში მაიკლ ლალი. საქართველოს მხრიდან შეხვედრას ესწრებოდნენ საგარეო საქმეთა მინისტრის პირველი მოადგილე დავით დონდუა და ეკონომიკისა და მდგრადი განვითარების მინისტრის მოადგილე მიხეილ ჯანელიძე.
ეკონომიკის სამინისტროს ინფორმაციით, სამუშაო ჯგუფმა კიდევ ერთხელ დაადასტურა აშშ-ისა და საქართველოს შორის ძლიერი ორმხრივი კავშირები. აშშ-ის წარმომადგენლებმა საქართველოს მიულოცეს ასოცირების შეთანხმებით გათვალისწინებული რეფორმების განხორციელების მხრივ მიღწეული პროგრესი და აღნიშნეს, რომ ამით საქართველო წარმატებით განაგრძობს ევროატლანტიკურ სივრცეში ინტეგრაციის მიზნით მუშაობას. აშშ-ს მხარემ ასევე გამოხატა მზადყოფნა, რომ დაეხმაროს საქართველოს ასოცირების ხელშეკრულებით და ღრმა და ყოვლისმომცველი თავისუფალი სავაჭრო სივრცით გათვალისწინებული რეფორმების განხორციელებაში.
სამუშაო ჯგუფმა ასევე განიხილა „საქართველო 2020“ სტრატეგია, რომლის განხორციელებაც საქართველოს, კერძო სექტორის მუდმივი კონსულტაციის ფონზე, ამერიკის შეერთებულმა შტატებმა ურჩია. მათ ასევე ყურადღება გაამახვილეს სოფლის მეურნეობის, ინტელექტუალური საკუთრების, საჯარო და კერძო სექტორის, ენერგოუსაფრთხოების, ინფრასტრუქტურის, ინოვაციისა და მეწარმეობის სფეროში ორმხრივი თანამშრომლობის საკითხებზე. აშშ-ს წარმომადგენლები მიესალმნენ საქართველოს პროგრესს შემდეგ სფეროებში: ინტელექტუალური საკუთრების უფლებები, შრომითი უფლებების დაცვა, კონკურენციის კანონმდებლობის განვითარება და დამოუკიდებელი კონკურენციის სააგენტოს ჩამოყალიბება.
„აშშ-ის მხარემ კიდევ ერთხელ გაუსვა ხაზი მათ მხარდაჭერას, რომ რეგიონში ბიზნესის, სავაჭრო და ლოგისტიკურ სფეროში საქართველოს ეკონომიკური როლი გაიზარდოს. მათ ასევე აღნიშნეს საქართველოს მიერ გაწეული მნიშვნელოვანი ძალისხმევა "აბრეშუმის გზის" რეაქტივაციის საკითხებში, რომელიც სამხრეთ კავკასის საშუალებით ევროპისა და აზიის ბაზრებს ერთმანეთთან აკავშირებს. შეხვედრის მონაწილეებმა დაადასტურეს სატრანსპორტო ინფრასტრუქტურის გაუმჯობესებისა და რეგიონული თანამშრომლობის გაძლიერების დიდი მნიშვნელობა, რათა აღმოიფხვრას სავაჭრო კორიდორში არსებული შეფერხებები. აშშ-მა კვლავ დაადასტურა მისი მხარდაჭერა და გამოთქვა ოქტომბერში საქართველოს „აბრეშუმის გზის“ ფორუმში მონაწილეობის სურვილი.
მხარეებმა ასევე აღნიშნეს ის პროგრესი, რომელიც მიღწეულ იქნა სავაჭრო საკითხებზე საექსპერტო დონეზე მოლაპარაკებებში და შეთანხმდნენ, რომ განაგრძობენ სხვადასხვა საშუალებებით ორ ქვეყანას შორის ვაჭრობისა და ინვესტიციის მიმართულებით თანამშრომლობის გაძლიერებას, მომავალში თავისუფალი ვაჭრობის შესახებ ხელშეკრულების გაფორმების ჩათვლით. ამ მხრივ, მხარეები მიესალმნენ ვაშინგტონში 29 ივნისს დაგეგმილ მაღალი დონის სავაჭრო და საინვესტიციო დიალოგს. ამასთანავე, სამუშაო ჯგუფმა აღნიშნა აშშ-ს სავაჭრო მისიის წარმატებული ვიზიტი საქართველოში 2015 წლის მარტში და ხაზი გაუსვა მაღალი დონის სავაჭრო და საინვესტიციო დიალოგის პარალელურად ქართული სავაჭრო მისიის ჩატარების მნიშვნელობას“, - ნათქვამია ეკონომიკის სამინისტროს განცხადებაში.
სტრატეგიული პარტნიორობის ქარტია არის აშშ-სა და საქართველოს შორის თანამშრომლობის გაღრმავების მნიშვნელოვანი მექანიზმი. ქარტია მოიცავს ოთხ ორმხრივ სამუშაო ჯგუფს შემდეგ პრიორიტეტულ საკითხებზე როგორიცაა: დემოკრატია და მმართველობა; თავდაცვა და უსაფრთხოება; ეკონომიკა, ვაჭრობა და ენერგეტიკა; და ხალხთაშორისი და კულტურული კავშირები.
დამატებითი ინფორმაციისთვის გთხოვთ ესტუმროთ საიტს: http://www.state.gov/p/eur/ci/gg/usgeorgiacommission/index.htm