საქართველოსა და პოლონეთს შორის დიპლომატიური ურთიერთობების აღდგენის 25 წლის იუბილის აღნიშვნის დღეს, 28 აპრილს, საქართველოსა და პოლონეთის საგარეო უწყების ხელმძღვანელებმა, დიპლომატიური არხების მეშვეობით, მისალოცი წერილები გაცვალეს.

საგარეო საქმეთა სამინისტროს ინფორმაციით, საქართველოს საგარეო საქმეთა მინისტრმა მიხეილ ჯანელიძემ პოლონელ კოლეგას  ქვეყნებს შორის დიპლომატიური ურთიერთობების დამყარების 25 წლის იუბილე მიულოცა და  აღნიშნა ორი ქვეყნის წარმატებული თანამშრომლობა და საქართველოსა და პოლონეთს შორის ურთიერთობებს განსაკუთრებული მეგობრობისა და სოლიდარობის სანიმუშო მაგალითი უწოდა.

მან მადლიერება გამოხატა პოლონეთის მიერ საქართველოს სუვერენიტეტისა და ტერიტორიული მთლიანობის, ისევე როგორც ევროპული და ევროატლანტიკური ინტეგრაციის მიმართ ურყევი მხარდაჭერისთვის, გამოცდილების გაზიარებისა და საქართველოს გვერდზე დგომისთვის.

თავის მხრივ, პოლონეთის საგარეო საქმეთა მინისტრმა, ვიტოლდ ვაშჩიკოვსკიმ თავის მისალოც წერილში აღნიშნა, რომ 1992 წლის 28 აპრილს ორმა სახელმწიფომ გადადგა ძალიან მნიშვნელოვანი ნაბიჯი, რომელიც უკავშირდებოდა ისტორიული კავშირების აღდგენას დამოუკიდებელ პოლონეთსა და დამოუკიდებელ საქართველოს შორის.

მინისტრმა კიდევ ერთხელ დაადასტურა პოლონეთის მხარდაჭერა საქართველოს ევროპულ და ევროატლანტიკური მისწრაფებებში და საქართველოს საერთაშორისო პოზიციების განმტკიცების საქმეში წარმატება უსურვა და გამოხატა ორ ქვეყანას შორის ურთიერთობების კიდევ უფრო გაღრმავების სურვილი.

შეგახსენებთ, რომ 1992 წლის 28 აპრილს საქართველომ და პოლონეთმა აღადგინეს დიპლომატიური ურთიერთობები. ოფიციალური პოლონეთის რესპუბლიკამ საქართველოს დამოუკიდებლობა 1919 წლის 29 იანვარს აღიარა, საქართველოს ანტანტის უმაღლესი საბჭოს მიერ დე-იურედ აღიარებამდე 2 წლით ადრე.

1995 წლის 20 ნოემბერს, პოლონეთის რესპუბლიკის საელჩო დაარსდა თბილისში, რომელმაც  1997 წლის შემოდგომაზე დაიწყო ფუნქციონირება.  2001 წლიდან პოლონეთში  საქართველოს საელჩო ბერლინში აკრედიტებული იყო.  2003 - 2004 წწ. ქართული დიპლომატიური მისია ფუნქციონირებდა უკვე პოლონეთის დედაქალაქში. საქართველოს საელჩო ვარშავაში ხელახლა  2005 წელს გაიხსნა. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რუსეთი საწვავის შოკის წინაშე დგას: ბენზინის ფასები ერთ წელიწადში 20%-ით გაიზარდა

„საშინელი და უპრეცედენტო რეკორდი“ - რუსეთის არმიის დანაკარგებმა უკრაინაში 1.4 მილიონს მიაღწია

პროკურატურამ არასრულწლოვანი შვილების მიმართ ჩადენილი ტრეფიკინგის ფაქტზე 3 პირს ბრალდება წარუდგინა

ლაიენი: სამხრეთ კავკასია მსოფლიოს უდიდესი გზაჯვარედინია, სტრატეგიული მნიშვნელობა ზრდას აგრძელებს და აზერბაიჯანს ცენტრალური როლი აქვს