კრემლი ოკუპირებულ სამხრეთ ოსეთში ჩატარებული ე.წ. არჩევნების შედეგებით კმაყოფილია

2017-04-10 15:23:53, 860 ნახვა

რეგიონი

ოფიციალური კრემლი ოკუპირებულ სამხრეთ ოსეთში ჩატარებული დე-ფაქტო საპრეზიდენტო არჩევნების შედეგებით კმაყოფილია, - ამის შესახებ ინფორმაციას "სპუტნიკ-ოსეტია" კრემლის პრეს-მდივანზე დიმიტრი პესკოვზე დაყრდნობით ავრცელებს.

როგორც პესკოვმა აღნიშნა, ე.წ არჩევნები პოლიტიკურად კონკურენტუნარიანი და გამჭვირვალე იყო.

"ჩვენ მივესალმებით სამხრეთ ოსეთში ჩატარებულ საპრეზიდენტო არჩევნებს. ვაცხადებთ, რომ ეს იყო პოლიტიკურად კონკურენტუნარიანი და გამჭვირვალე არჩევნები. კიდევ უფრო მეტად გვახარებს, რომ ძირითადი ბრძოლა ორ კანდიდატს შორის იყო, რომლებიც სამხრეთ ოსეთისა და რუსეთის ფედერაციის მჭირდო მეგობრობის მომხრეა. ჩვენ ამ განწყობას, მივესალმებით", - აღნიშნა პესკოვმა.

ცნობისთვის, ოკუპირებული სამხრეთ ოსეთის დე-ფაქტო პრეზიდენტის არჩევნებში ე.წ პარლამენტის სპიკერი ანატოლი ბიბილოვი იმარჯვებს.

შეგახსენებთ, რომ გუშინ ოკუპირებულ რეგიონში დე-ფაქტო საპრეზიდენტო არჩევნები გაიმართა. "არჩევნების" გარდა, ოკუპირებულ სამხრეთ ოსეთში, რეგიონის სახელის შეცვლასთან დაკავშირებით ე.წ რეფერენდუმიც ჩატარდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან