ტუღუში: არ გამოვრიცხავ, რომ შემოსული კანდიდატურები ხელისუფლებისთვის პრობლემებს აჩენდა და ვადის გახანგრძლივებას ცდილობენ

2017-03-15 12:17:20, 1869 ნახვა

პოლიტიკა კომენტარი

ფრაქცია „მოძრაობა თავისუფლებისთვის - ევროპული საქართველოს“ წევრი გიორგი ტუღუში იუსტიციის სამინისტროს მიერ ადამიანის უფლებათა ევროპულ სასამართლოში წარსადგენი კანდიდატების განცხადებების მიღების ვადის გახანგრძლივებას საეჭვო ნაბიჯად აფასებს. ტუღუში არ გამორიცხავს, რომ კანდიდატურები, რომლებმაც განაცხადი შეიტანეს, ხელისუფლებისთვის გარკვეულ პრობლემებს აჩენდა:

„ძალიან საეჭვო ნაბიჯია, გარდა ამისა, როგორც ჩანს, ეს არღვევს იგივე მთავრობის განკარგულებას, რომელიც გამოცემულია, რომ 1 აპრილამდე ახალი სია უნდა გადაგზავნილიყო სტრასბურგში. არ გამოვრიცხავ, რომ ის კანდიდატურები, რომლებიც შემოვიდა, ხელისუფლებისთვის გარკვეულ პრობლემებს აჩენდა და ცდილობენ, ვადა გაახანგრძლივონ, რათა ბევრმა სხვა კანდიდატურამ შეიტანოს თავისი განაცხადი“,-აღნიშნა გიორგი ტუღშმა.

იუსტიციის სამინისტრომ ადამიანის უფლებათა ევროპულ სასამართლოში წარსადგენი კანდიდატების განცხადებების მიღების ვადა 2017 წლის 13 აპრილამდე გაახანგრძლივა.

შეგახსენებთ, სტრასბურგში საქართველოდან წარდგენილი მოსამართლეობის კანდიდატების სია ჩავარდა. საქართველოდან წარდგენილი მოსამართლეობის კანდიდატები იყვნენ: ევა გოცირიძე, ალექსანდრე ბარამიძე და გიორგი ბადაშვილი. მოსამართლეებს ევროსაბჭოს 1-მა წევრმა დაუჭირა მხარი, ხოლო 5 წინააღმდეგ წავიდა.

საქართველოს ხელისუფლებამ თავიდან უნდა ჩაატაროს კონკურსი და ახალი კანდიდატები გაგზავნოს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან