თბილისის 95-ე საჯარო ბაგა-ბაღის შენობა ენერგოეფექტურ შენობად გადაკეთდა.

მერიის ინფორმაციით, ჩატარებული სამუშაოების შედეგად, ზამთარში გათბობის აუცილებელი სამომხმარებლო სიმძლავრე 58%-ით შემცირდება. ცხელი წყლის მომარაგებისათვის ელექტრო გამაცხელებლების ნაცვლად კი მზის კოლექტორები დამონტაჟდა, რომელთა გამოყენებაც ელექტროენერგიის მოხმარების 51%-ით შემცირებას უზრუნველყოფს.

განახლებულ ბაგა-ბაღში დღეს თბილისის მერი დავით ნარმანია მერიის ეკონომიკური განვითარების სამსახურის უფროსთან და ჩუღურეთის გამგებელთან ერთად იმყოფებოდა.

ნარმანიას განცხადებით, აღნიშნული საპილოტე პროექტით  გაცილებით ნაკლები დაჯდება ბაღის მოვლა-პატრონობა და შემცირდება გამონაბოლქვის მოცულობა.

„გაკეთდა საპილოტე ენერგოეფექტური პროექტი, რომლის შედეგადაც ელექტროენერგიის და ბუნებრივი აირის მოხმარების მნიშვნელოვანი დანაზოგი კეთდება. სისტემა მთლიანად გადავიდა მზის ენერგიაზე. გარდა ამისა, მოხდა შენობის ცალკეული კომპონენტების შეცვლა, რაც გათბობაზე მოხმარებულ ენერგიას დაზოგავს. საბოლოო ჯამში ფინანსურად გაცილებით ნაკლები დაგვიჯდება ბაღის მოვლა-პატრონობა. ასევე გარემოს დაცვის თვალსაზრისით ეს არის უმნიშვნელოვანესი პროექტი, რადგან 20 ტონით შემცირდება გამონაბოლქვი CO2-ის მოცულობა, რითაც ვასრულებთ პირობას, რომელსაც თბილისის მერიამ ხელი 2010 წელს მოაწერა. საუბარია მერების შეთანხმებაზე, რომლის მიხედვითაც გვაქვს ვალდებულება, 2020 წლამდე 20%-ით შევამცირიოთ CO2-ის მოცულობა“, - განაცხადა დავით ნარმანიამ.

გათბობის სისტემაში თბური ტუმბოს და ფოტოვოლტაიკების ერთობლივი გამოყენებით მიღებული ეკონომია ბუნებრივი აირის მოხმარების დამატებით 10%-იან შემცირებას უზრუნველყოფს. ფოტოვოლტაიკების მიერ გენერირებული ელექტროენერგია კი ქსელიდან მიღებულ ენერგიას 20%-ით შეამცირებს.

განხორციელებული სამუშაოების შედეგად CO2-ის ემისიის შემცირება წლიურად 22 ტონას შეადგენს.

2016 წელს თბილისში, ჯამში, 10 ახალი საბავშვო ბაგა-ბაღის მშენებლობა დაიწყება და ყველა შენობა ენერგოეფექტური იქნება. 

NS

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს

მოქალაქეების 71% მხარს უჭერს ქვეყნის ევროკავშირში გაწევრიანებას, თუმცა 49% მიიჩნევს, რომ საქართველო ევროინტეგრაციის პროცესში არასწორი მიმართულებით მიდის

ლელო: სააკაშვილის განცხადება პოლიტიკური განხეთქილების შექმნის მცდელობაა