ეროვნულ სასწავლო ცენტრ „კრწანისის“ იუბილესთან დაკავშირებით, საზეიმო ცერემონიალი გაიმართა

2016-04-27 15:58:20, 936 ნახვა

სამხედრო

ეროვნულ სასწავლო ცენტრ „კრწანისის“ დაარსებიდან 19 წელი გავიდა.

თავდაცვის სამინისტროს ინფორმაციით, იუბილესთან დაკავშირებით, საზეიმო ცერემონიალი სასწავლო ცენტრის სამწყობრო მოედანზე გაიმართა. ღონისძიებას თავდაცვის მინისტრის მოადგილეები - დავით ებრალიძე და ანა დოლიძე, ასევე, გენერალური შტაბის უფროსის მოადგილე, პოლკოვნიკი ნიკოლოზ აგლაძე დაესწრნენ.

სამხედრო მოსამსახურეებს სიტყვით თავდაცვის მინისტრის პირველმა მოადგილემ დავით ებრალიძემ, პოლკოვნიკმა ნიკოლოზ აგლაძემ და ცენტრის მეთაურმა, პოლკოვნიკმა გრიგოლ ჭელიძემ მიმართეს, მათ წარმატებები უსურვეს და ეროვნულ სასწავლო ცენტრ „კრწანისის“ მნიშვნელოვან როლზე გაამახვილეს ყურადღება.

საზეიმო ღონისძიებების ფარგლებში დაჯილდოების ცერემონიალიც გაიმართა. თავდაცვის მინისტრის ბრძანებით, საქართველოსა და აშშ-ს შორის სამხედრო გნვითარების საქმეში შეტანილი წვლილისთვის, ვიცე-პოლკივნიკი ენდრიუ მუნრო, კაპიტნები ტომას კარპენტერი, ფილ ქვანი და შტაბის სერჟანტი რობერტ ვალენზუელა მედლებით - „გენერალი კვინიტაძე“ დაჯილდოვდნენ. სამხედრო მოსამსახურეებს ჯილდო თავდაცვის მინისტრის მოადგილეებმა გადასცეს.

მოგვიანებით, სტუმრებმა სასწავლო ცენტრის ტერიტორიაზე გამოფენილი ტექნიკა, იარაღი და აღჭურვილობა დაათვალიერეს.

ღონისძიება საზეიმო მიღებითა და ტორტის გაჭრით დასრულდა.

ეროვნული სასწავლო ცენტრი "კრწანისი" 1997 წლის 22 აპრილს თავდაცვის მინისტრის ბრძანებით, „იაღლუჯას" პოლიგონის ბაზაზე ჩამოყალიბდა. 2002 წლიდან ცენტრში ამერიკელი ინსტრუქტორების მიერ ქვედანაყოფების მომზადება "წვრთნისა და აღჭურვის" (GTEP) პროგრამით დაიწყო, მომზადდა ხუთი ბატალიონი.

ეროვნულ სასწავლო ცენტრში სამხედრო მოსამსახურეთა პროფესიული დონის ამაღლების მიზნით, სხვადასხვა წვრთნები, მათ შორის, რეკრუტთა საბაზისო მომზადების სწავლებები ხორციელდება. 2015 წლის 27 აგვისტოს ეროვნული სასწავლო ცენტრის ტერიტორიაზე ნატო-საქართველოს წვრთნისა და შეფასების ერთობლივი ცენტრი გაიხსნა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან