ნოდარ ხადური ევროპის რეკონსტრუქციისა და განვითარების ბანკის წარმომადგენლებს შეხვდა

2016-04-11 14:50:10, 760 ნახვა

ეკონომიკა

ევროპის რეკონსტრუქციისა და განვითარების ბანკის მხარდაჭერით მიმდინარე პროექტები და საქართველოსთან სამომავლო თანამშრომლობის მიმართულებები განიხილეს ფინანსთა მინისტრმა, ნოდარ ხადურმა და ბანკის წარმომადგენლებმა დღეს ფინანსთა სამინისტროში გამართული შეხვედრისას.

ფინანსთა სამინისტროს ინფორმაციით, საუბარი შეეხო EBRD-ის ახალ, 4-წლიან სტრატეგიას საქართველოსთვის, რომელიც მოიცავს ჩვენი ქვეყნისთვის პრიორიტეტულ ყველა მიმართულებას, მათ შორისაა, კერძო სექტორის წახალისება და მხარდაჭერა, ენერგოდამოუკიდებლობა და დივერსიფიკაცია, საქართველოს რეგიონული და გლობალური ინტეგრაციის ხელშეწყობა.

ამჟამად, EBRD-ის მხარდაჭერით, ქვეყანაში ფინანსდება მნიშვნელოვანი პროექტები ენერგეტიკასა და მუნიციპალურ ინფრასტრუქტურაში. ბანკი ასევე აქტიურად თანამშრომლობს კერძო სექტორთან - მნიშვნელოვანია მისი როლი საქართველოში ფინანსური ბაზრების განვითარების კუთხითაც. აღსანიშნავია, ბანკის თანამშრომლობა ინვესტორთა საბჭოში, რომელიც კიდევ ერთი პლატფორმაა ბიზნესის მხარდაჭერის მიმართულებით.

როგორც აღინიშნა, უახლოეს პერიოდში, ევროპის რეკონსტრუქციისა და განვითარების ბანკთან ერთად, ხელი მოეწერება ხელშეკრულებებს, რომელიც ითვალისწინებს ისეთი პროგრამების დაფინანსებას როგორებიცაა: დედაქალაქის ავტობუსების პარკის განახლება და მყარი ნარჩენების მართვის მიმართულებით თანამშრომლობა.

შეხვედრაზე მხარეებმა იმედი გამოთქვეს, რომ საქართველოსთან წარმატებული პარტნიორობა გაგრძელდება და ბანკის ფინანსური მხარდაჭერით ინფრასტრუქტურაში, ენერგეტიკაში, სოფლის მეურნეობასა და ტურიზმის სფეროში განხორციელდება მნიშვნელოვანი პროექტები, რომლებიც უზრუნველყოფენ ქვეყნის განვითარებას და ეკონომიკურ ზრდას.

შეხვედრას ესწრებოდა EBRD-ის კავკასიის, მოლდოვისა და ბელარუსის წარმომადგენლობების დირექტორი ბრუნო ბალვანერა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან