იემენში აფეთქებების შედეგად, 26 ადამიანი გარდაიცვალა

2016-03-26 12:13:02, 1162 ნახვა

მსოფლიო

იემენის სამხრეთ რეგიონში მდებარე ქალაქ ადენში 3 თვითმკვლელმა ტერორისტმა თავი აიფეთქა, რასაც 26 ადამიანის სიცოცხლე ემსხვერპლა, - ამის შესახებ ინფორმაციას Reuters-ი დაცვის სამსახურზე დაყრდნობით ავრცელებს.

მედია საშუალების ინფორმაციით, არის ათობით დაშავებული, მათ შორის ბავშვები და ქალები. ტერაქტზე პასუხისმგებლობა „ისლამურმა სახელმწიფომ“ უკვე აიღო. დაჯგუფებამ იემენში მოქმედება სამოქალაქო ომის დაწყების შემდეგ დაიწყო. მას შემდეგ „ისლამურმა სახელმწიფომ“ არაერთი თავდასხმა განახორციელა.

ერთ-ერთი აფეთქება დანაღმული სასწრაფო მანქანით განხორციელდა, რომელიც სამხედრო პოსტზე შევიდა. აღნიშნულ აფეთქებას 14 ჯარისკაცის სიცოცხლე ემსხვერპლა. კიდევ 2 აფეთქება სხვა სამხედრო პოსტებზე განხორციელდა. როგორც ადგილობრივი მთავრობა აცხადებს, აღნიშნულ 2 აფეთქებას კიდევ 12 ადამიანი შეეწირა, თუმცა უცნობია არიან თუ არა მათ შორის ჯარისკაცები.

როგორც ადგილობრივი მთავრობის წარმომადგენელი აცხადებს, გარდაცვლილთა უმეტესი ნაწილი სამოქალაქო პირია.

ცნობისთვის, "ისლამური სახელმწიფო" იემენში სამთავრობო ძალებისა და ამბოხებული შიიტი ჰუსიტების წინააღმდეგ იბრძვის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან