შსს თბილისში მაღაზიაში მომუშავე ქალბატონის დაჭრას არ ადასტურებს

2016-03-20 14:59:59, 734 ნახვა

სამართალი

შინაგან საქმეთა სამინისტრო თბილისში, გადასასვლელი ხიდის მიმდებარე ტერიტორიაზე, მდებარე სასურსათო მაღაზიის გამყიდველის დაჭრის ფაქტს არ ადასტურებს. როგორც "ექსპრესნიუსს" შინაგან საქმეთა სამინისტროს პრესსამსახურში განუცხადეს, ადგილი ჰქონდა არა შეიარაღებულ თავდასხმას, არამედ- ძარცვის მიზნით მაღაზიაში შევარდნას.

" ერთი პირი იყო, ორი იყო, რამე წაიღეს თუ არა, დეტალები არვიცი, გამოძიება დაადგენს. იარაღი არ ფიგურირებს",-აცხადებენ შსს-ში.

მათივე ინფორმაციით, მაღაზიაში მომუშავე ქალბატონს ფიზიკურად გაუსწორდნენ და ის საავადმყოფოში სწორედ ამის გამო გადაიყვანეს, თუმცა ვინაიდან მისი ჯანმრთელობის მდგომარეობა მძიმე არ იყო, მალევე გამოწერეს.

გამოძიება სისხლის სამართლის კოდექსის 178-ე, ძარცვის მუხლით მიმდინარეობს.

შეგახსენებთ, დილით გავრცელდა ინფორმაცია, რომ თბილისში, გადასასვლელი ხიდის მიმდებარე ტერიტორიაზე, სასურსათო მაღაზიაზე შეიარაღებული თავდასხმა მოხდა, რა დროსაც გამყიდველი დაიჭრა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან