ქართველი სამხედროები რაგბის საერთაშორისო ტურნირისთვის ემზადებიან

2015-10-04 16:55:55, 771 ნახვა

საზოგადოება

საქართველოს შეიარაღებული ძალების სამხედრო მოსამსახურეებით დაკომპლექტებული გუნდი „არმია“ რაგბის საერთაშორისო ტურნირში მონაწილეობისთვის გაერთიანებულ სამეფოში გაემგზავრა.

ქართველმა სამხედრო რაგბისტებმა დიდი ბრიტანეთის სამეფო საჰაერო ძალების ბაზაზე „რაფ ჰალტონი“ პირველი ვარჯიში უკვე გამართეს. საქართველოს შეიარაღებული ძალების ჯარისკაცები 8 ოქტომბერს „რაფ ჰალტონზე“ სამხრეთ აფრიკის რესპუბლიკის სამხედრო მოსამსახურეების რაგბის ნაკრების წინააღმდეგ ასპარეზობისთის ემზადებიან.

შეიარაღებული ძალების წარმომადგენელთა შორის მსოფლიო რაგბის ტურნირი წელს მეორედ იმართება. საქართველო რეგიონიდან ერთადერთი ქვეყანაა, რომელიც გამარჯვებისთვის 9 ქვეყნის 12 გუნდს შორის იბრძოლებს. პირველ ეტაპზე ქართველი სამხედრო რაგბისტები სამხრეთ აფრიკის რესპუბლიკის გუნდის გარდა, დიდი ბრიტანეთისა და ტონგას ნაკრებებს დაუპირისპირდებიან.

დიდი ბრიტანეთისა და ჩრდილეოთ ირლანდიის გაერთიანებულ სამეფოში გამგზავრებამდე, საქართველოს შეიარაღებული ძალების რაგბის ნაკრებმა 10-დღიანი შეკრება სოფელ ნოქალაქევში გაიარა. ნაკრები სხვადასხვა სამხედრო ნაწილებიდან სპორტული მიღწევებით გამორჩეული სამხედროებით არის დაკომპლექტებული.