ამერიკელი დიპლომატები მოუწოდებენ მაიკ პომპეოს, დაგმოს ტრამპის როლი ვაშინგტონში მომხდარ არეულობებში

2021-01-09 12:34:58, 1292 ნახვა

მსოფლიო

ამერიკელი დიპლომატები მოუწოდებენ სახელმწიფო მდივან მაიკ პომპეოს, დაგმოს მოქმედი პრეზიდენტის, დონალდ ტრამპის როლი აშშ-ის კაპიტოლიუმში მომხდარი აჯანყების მცდელობაში.

ამის შესახებ ინფორმაციას „სიენენი“ ავრცელებს.

გამოცემის ცნობით, 100-მდე დიპლომატი პომპეოს სახელზე მემორანდუმს ამზადებს, რომელიც მას მალევე გადაეგზავნება.

დიპლომატები დოკუმენტში აღნიშნავენ, რომ პომპეოს, რომელსაც მკაფიო სამომავლო პოლიტიკური ამბიციები აქვს, არასდროს დაუფიქსირებია პრეზიდენტის კრიტიკა და დიპლომატების მხრიდან მითითებებს ელოდებოდა.

მათივე განცხადებით, სახელმწიფო დეპარტამენტმა აშშ-ის ხელისუფლებაზე განხორციელებულ თავდასხმაში პრეზიდენტის როლი უნდა დაგმოს.

100-მდე ამერიკელმა დიპლომატმა ხელი მოაწერა დოკუმენტს, რომელთა იმედგაცრუება გამოიწვია მდივნისა და სახელმწიფო დეპარტამენტის სხვა ლიდერების მხრიდან ძალადობაზე რეაგირების არარსებობამ. კვირის დასაწყისში სახელმწიფო დეპარტამენტმა საელჩოებს მისცა მითითებები, თუ როგორ უნდა განიხილონ ძალადობრივი თავდასხმა კაპიტოლიუმზე, მაგრამ მასში არ იყო ნახსენები ტრამპის როლი ამ მოვლენების განვითარებაში, რამაც აღაშფოთა დიპლომატები, რომლებიც ამ საქმეში მოქმედი პრეზიდენტის პირდაპირ კავშირს ხედავენ.

„მისმა წაქეზებამ გამოიწვია ძალადობრივი ამბოხი აშშ-ის კაპიტოლიუმში, ხუთი ადამიანი დაიღუპა და დაშავდა არაერთი პირი. სამთავრობო ქონების განადგურებამ და ვანდალიზმმა ზიანი მიაყენა ჩვენი ქვეყნის დემოკრატიულ სისტემას და იმიჯს“, - აღნიშნულია მემორანდუმში.

ცნობისთვის, 6 იანვარს, ვაშინგტონში, სადაც საპრეზიდენტო არჩევნების შედეგებს ამტკიცებდნენ, დონალდ ტრამპის მხარდამჭერები კაპიტოლიუმის შენობაში შეიჭრნენ. დემონსტრანტები ჯო ბაიდენის გამარჯვებას აპროტესტებდნენ. შენობიდან კონგრესმენთა ევაკუაცია განხორციელდა, არეულობის შედეგად კი ხუთი ადამიანი დაიღუპა.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან